رئيس التحرير: غمدان أبو علي - مدير التحرير: عرفات مكي

أنا وأولادي !!

الحديدة نيوز / كتب / عبدالجليل حيدر Bn Haider

مصطفى ثالث ابتدائي ورغودة خامس ابتدائي..
اتفقت معهم انه لاتتعبوش من اجل تحصل على المركز الاول او الثاني والا حتى الثالث فقط عشان تنافس صاحبك والا عشان تحصل على هدية ..
وفهمتهم ان عمري ما حزعل اذا ما كنتوا اوائل..
ولكن فهمتهم واتفقنا على امور اخرى..
..
لما اسألك لازم يكون عندك جواب مافيش جواب لازم تحاول تجاوب.. حاول تفكر في الاجابة.. تذكر وتعلم كيف تستررجع معلوماتك وانا اوعدك اعطيك الفرصة والوقت الكافي عشان تجاوب..
..
فهمتهم انه في الاختبارات يحدث انه نغلط يمكن نرتبش ويمكن ننسى الاجابة الصحيحة رغم اننا نعرفها.. ولذا عمري ما بزعل منكم لو غلطتم في الاختبارات بس يكون غلط محدود مش في كل شيء لانه لو الاخطاء كثيرة هذا يعني انك مش مذاكر ولا مستعد ويمكن تكون مهمل.
..
فهمتهم ايضا انه انتبه تغار او تتحسس وتزعل لو المدرسة كرموا زملاءك وانت لا. تعال لعندي وكلمني ايش اللي تشتيه وانا بعمل اتفاق انا وانتم وبكرمكم انا..
..
اتفقت معاهم انه في حال اجتهدت وحققت المركز الاول تقدر تختار الهدية اللي تشتيها وانا علي اشتريها ايش ما كانت .
ولو جبت الثاني ايضا تقدر تختار هديتك انت بس نحدد سقف المبلغ
ولو جبت الثالث هديتك مني انا بطريقتي انا ، اما اذا ما حققت مركز فشكرا لكم انكم اجتهدتم وتعبتم بس مافي اي هدية ..
فهمتهم انهم بيتعرضوا لمواقف كثيرة في حياتهم لما يكبروا وما بيكونوش الناس يعاملوهم زيما يعاملهم الاب والا الام عشان كذا لازم تكونوا مستعدين وجاهزين انكم تتقبلوا الناس وتعرفوا تتصرفوا في كل المواقف..
..
في اتفاقات كثيرة اعقدها معهم ونمشي عليها ولذا التعامل معهم ممتع وسهل وجدا. يمكن تقولوا هذول اطفال وصعب واحد يحاصرهم اتفاقات وكلام كبار بس صدقوني وعن تجربة انهم اكثر احترافية في الاتفاقات ويحفظوها ويطبقوها وعمرهم ما نسوا اتفاق واحد رغم اني انا اللي انساها بس هم يرجعوا يذكروني ويحاسبوني..
..
تعاملوا مع اولادكم وعلموهم ان الحياة مش مثالية ولازم يستعدوا ويتعلموا كيف يتصرفوا..
توقعوا لهم احداث ما قد حدثت لهم واشرحوا لهم كيف يتصرفوا لو ان هذا الامر حدث وشوفوا كيف حيتصرفوا.. وبجيب لكم مثال بسيط :
جربوا تعلموهم انه لو خرجتم السوق وحصل انه ضاع عليكم مثلا.. علمه انه يروح لعند الكاشير او رجل الامن ويعطيه رقمك ويتصل عليك.. جربوا وحتنبهروا من تصرفهم ..
تربية الابناء عمرها ما كانت.. تاكله وتشربه وتلبسه وتدرسه ولو مرض تعالجه.. لاااا لااا.. التربية يعني تبنيه بناء وتهتم لجميع التفاصيل.
..
طولت عليكم بس الموضوع مهم.

شاهد أيضاً

مظاهر الاحتفال والتعايش بذكرى المولد النبوي في الحديدة

مظاهر الاحتفال والتعايش بذكرى المولد النبوي في الحديدة أنور الطيب – الحديدة نيوز المولد النبوي …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *